Paano na kami?

Ugong ugong sa singit singit ng bawat iskinita ang masangsang na balitang magtataas ng pasahe sa LRT line 1, 2 at MRT, at kamakailan nga ay nanginig ang tuhod ng ating mga kababayan nang aprubahan ng Department Of Transportation and Communication ang naturang fare hike, well tingnan nga natin kung ano ang magiging epekto nito sa ating mga istudyante, aplikante, nagtatrabaho at simpleng lagalag.

Unang una nating pagtsismisan ang alibi nila, kakailanganin raw magtaas ng pasahe upang bigyang daan ang pagkukumpuni sa riles ng LRT at MRT upang makatugon sa pagpapabilis ng takbo ng mga tren, mula 40 kph ay gagawing 60 kph ang takbo ng mga higanteng uod sa Metro Manila, oo nga naman maganda ang hangarin, ngunit ang pagbabawas sa subsidiya ng gobyerno sa mga pasahero bilang dahilan ay hindi katanggap tanggap, bakit ito ang gagawing solusyon sa kakulangan ng budget gayong alam naman nating marami pang kurap na mas kumakain ng malaking pondo ng pamalaan, kung nagtitipid kayo dahil kulang na sa pera, bakit hindi ninyo hanapin ang mga nawawalang pondo ng pamahalaan na tiyak kong higit na mas malaki kaysa ititipid ninyo sa subsidiya sa ating mga kababayan? 

Para sa mga pasaherong magmumula sa Roosevelt patungong baclaran, kayo ay magbabayad na ng tumataginting na trenta pesos mula beinte, at para naman sa mga nagkukumahog nating kababayan na naglalakbay mula Recto hanggang Marikina, maghanda na kayo ng Bente singko pesos dahil hindi na kinse ang mababawas sa minamahal niyong pitaka, ang naturang pagtataas ng pasahe ay magiging epektibo sa pagsabog ng bukang liwayway sa unang araw ng Marso, magpasalamat kayo sa nagsulong ng resolusyon na yan, kaya kung may reklamo kayo, sila ang kuyugin niyo at bakit pumasok sa kanilang kukote ang dagdag na pahirap sa mga Pilipinong wala na ngang makain ay dinagdagan pa ng bagong poproblemahin.

Bukod rito, isipin niyo nga mga kagalang-galang na tagapagpatupad ng batas at mga kawani ng DOTC, ang pinakamainam na dahilan kung bakit pinipiling sumakay ng tao sa LRT at MRT ay dahil mas mababa ang pasahe rito kumpara sa mga pampublikong sasakyan tulad ng bus at jeepney, sa oras na maipatupad ang pagtatas ng pasahe, siguradong mas pipiliin na nilang gumising nang maaga at makipagsabayan sa mainit at sisiksikang kalsada na magdudulot naman ng matinding trapiko, kapag may trapik mas maraming polusyon, kapag may polusyon may global warming kapag may global warming natural mas mainit, kapag mas mainit ang mundo, magugunaw tayo, kapag nagunaw na, edi patay tayong lahat, naku kung di nga naman talaga kayo mamamatay tao oh!

Imulat niyo nga ang mga mata niyo  mga dudong, hindi pagtitipid sa serbisyong bayan ang solusyon kundi ang pinagkukunang yaman tulad ng pagtugis sa mga damuhong na tumatakbo sa buwis at mga patay gutom na kurakot na akala mo'y mauubusan ng yaman sa mundo at masyadong ganid sa pera!